Халқаро ташкилотлар

Бирлашган Миллатлар Ташкилоти халқаро тинчлик ва хавфсизликни сақлаш ва мустаҳкамлаш, шунингдек, давлатлар ўртасидаги ҳамкорликни ривожлантириш мақсадида ташкил этилган халқаро ташкилотдир. Барқарор Ривожланиш Мақсадлари барча мамлакатлар - камбағал, бой ва ўрта ривожланган мамлакатлар учун ҳаракатга чақирувдир. У фаровонликни яхшилаш ва сайёрамизни ҳимоя қилишга қаратилган.

Пул ювишга қарши кураш бўйича молиявий ҳаракатлар гуруҳи (Financial Action Task Force on Money Laundering – FATF) – бу халқаро ташкилот бўлиб, пул ювиш, терроризмни молиялаштириш ва оммавий қирғин қуролларини тарқатишга қарши курашиш бўйича стандартлар ва тавсиялар ишлаб чиқади. Асосий вазифалар: Стандартлар ишлаб чиқиш, давлатлараро ўзаро баҳолашларни ўтказиш ва уларнинг бажарилишини назорат қилиш.

Коррупцияга қарши давлатлар гуруҳи (Group of States Against Corruption – GRECO) – Европа Кенгаши органи бўлиб, халқаро коррупцияга қарши стандартларга риоя этилишини назорат қилади. Асосий вазифалар: Коррупцияга қарши чораларни баҳолаш ва аъзо давлатлар учун тавсиялар ишлаб чиқиш.

Иқтисодий ҳамкорлик ва ривожланиш ташкилоти (Organisation for Economic Co-operation and Development – OECD) – иқтисодий ривожланиш ва халқаро савдони рағбатлантириш учун давлатларни бирлаштирувчи халқаро ташкилот. Асосий вазифалар: Тадқиқотлар ўтказиш, иқтисодий тавсиялар ишлаб чиқиш ва турли соҳаларда, жумладан солиқ жиноятлари ва коррупцияга қарши курашиш бўйича стандартлар белгилаш.

Америка давлатлари ташкилоти (Organization of American States – OAS) – Шимолий ва Жанубий Америкадаги давлатларни демократия, инсон ҳуқуқлари, хавфсизлик ва иқтисодий ҳамкорликни мустаҳкамлаш мақсадида бирлаштирувчи минтақавий халқаро ташкилот. Асосий вазифалар: Демократияни ривожлантириш, инсон ҳуқуқларини ҳимоя қилиш, коррупция ва жиноятчиликка қарши кураш.